بو گونلر کلاپ هاوس بتر مود اولوب، من ده میللتدن دالی قالماییم دئیه، گلیب گئده‌نه کلاپ هاوسا قوشولماغیمین پوزونو وئریرم. هر گئجه اؤزومه بیر پروفایل جورلاییب هر هارا گلدی سوخولورام.
دونن گئجه کلاپ هاوس دا سئیره چیخمیشدیم، قاپیلارین بیرینین باشیندا یازیلمیشدی: «گل ایچری، سئودیگین قیزی آختار تاپ!» عاغلیم باشیمدان چیخدی؛ سئوینجک تپیلدیم ایچرییه؛ گوردوم مین نفر مندن قاباق زنبیل قویوبدور. سانکی تره‌بار میدانی ایدی: سئچ ها سئچ‌ایدی. بزکلی دوزکلی خانیملار، آقالار شکیللرین تاماشایا قویموشدولار. بیر نفرده حراج ووروردو: «نازلیم، جانیم سن آغالارین هانسینی سئچرسن؟» بیر آن رحمتلیک مئشه‌دی عیباد یادیما دوشدو. هئچ اولماسا او بیر حامبال تاپیب، دوورا اوستوندن قیز گوروروردو، آداقبازلیق ائدیریدی. بوردا دموکراسیانین اوغلان چاغیندا بیز ۱۳۰۰ قدیمه قاییتمیشیق. حراجی‌دن آرواد آلیریق، شکیله قند سیندیریریق.
ایکی اوچ ساعات اوردا گیرلندیم، خانیملارین بیر به بیر پروفایلارین آرادیم باخدیم؛ آنجاق منی سئچن اولمادی کی اولمادی. آخی کللم کی کئچل‌ایدی، بورنومودا عمل ائله‌مه‌میشم. پروفایلیمین دا ائله بیر اؤزللیگی یوخویدو کی منی وارلی -کارلی گؤسترسین. سویو سوزولموش اوردان چیخدیم ائشییه. بیر آزدا دولاندیم. باشقا بیر قاپییا راست گلدیم. اوستونده یازمیشدی: «دبک‌لر…» من ده کی آنادان دبک دوغولموشام. سئوینجک آتیلدیم ایچرییه. اوتوز نفرین یاریسی آمریکادان، بیر آزی تورکیه‌دن، بئش آلتیسی دا اوروپادان دبک‌لره قوشولموشدولار. شیرین- شیرین، چوخ حرارتله کوردلری اؤلدورمه‌یه، آذربایجانین سرحدلرینی تعیین ائتمه‌یه مشغول‌ایدی‌لر. بیر آز اتشین فرمانلارا قولاق آسدیقدان سونرا قورخودان شله‌می ووردوم بئلیمه، اکیلدیم. سؤزون دوزون آختارسانیز، هله ایران‌لا عراق محاربه‌سینده آلدیغیم یارالار ساغالماییب. سکگیز ایل گئجه گوندوز بیر بیریمیزی قیردیق؛ ایندی عراقلی‌لارلا ائله جیجی – باجی اولموشوق کی آیری سیچیریق، بیر یئییریک. محاربه‌دن بیزه یالنیز گئنلمک قالیبدی.
دابانا قوت وئریب بورولدوم بیر دربنده. اؤزومو یئتیردیم دربندین لاپ دیب قاپیسینا. قاپی آچیق‌ایدی. یاواشجاسینا سوزدوم ایچرییه. آللاه گؤسترمه‌سین؛ فئمینیست قادینلارین بیری منبرده ایدی؛ بتر آتشین نیطق ائله‌ییردی. بویوروردو: «من بیلمیرم نه‌دن بو قاپییا قاروول قویمامیبسینیز؟ بوکیشی‌لر کی بیزیم حاققیمیزی یئییبلر بوردا نه گزیرلر؟! اونلاری نه‌دن یول وئریرسینیز بورا؟ منله اولسا بو کیشی‌لرین هامیسینی توتوب بوغارام. دونیانی وئرین قادینلارا. گؤرون نئجه عدالت برقرار ائدیرلر!»
یاواش – یاواش هاوا ایشیقلانیردی. ائله کلاپ هاوسون قاپیسیندان چیخاندا گنج بیر موهندیسه راست گلدیم. دئدی: «سنی آللاه یئتیریب، بیر نفر آختاریردیق گله بو «حقیقت صندلیسی»نین اوستونده اوتورا. بوردا اوتورماغین یالنیز بیر شرطی وار: گرک سندن هر نه سوروشسالار دوزون دئیه‌سن.» من کی بتر یورولموشدوم قبول ائله‌دیم. اوتورماق هامان، صندلین صاحابی دئدی: «دوکتور نوبت سیزیندی!» آغای دوکتور نه آلدی نه ساتدی دئدی: «ایندییه‌جن اوتوبوسدا شورتوو چیخاردیبسان؟» هله اونا جواب وئرمه‌میشدیم باشقاسی سوروشدو: «گونده نئچه نفر سنه بارماق ائلر؟…»
گون چوخدان‌ایدی چیخمیشدی. ساعات دوققوز جواریندا ایدی. ایشه گئدنلر ایشه گئتمیشدیلر؛ یاتانلار ایسه اویانمیشدیلار. من هله سوواللارا جواب وئریردیم. هردن بیر اسنه‌ییردیم، آمما کلاپدان آیریلماغیم گلمیردی. گؤره‌سن باشقا میللت‌لرده بیزیم کیمی گئجه سحره‌جن کلاپدا گزیشیر، گوندوز ده آخشاماجان یاتیرلار؟!
